پاکستان ٹیلی وژن مشہور ترک ڈرامہ ‘ارطغرل’ اردو زبان میں نشر کرے گا

0 901

پاکستان کا سرکاری ٹیلی وژن چینل پی ٹی وی بہت جلد ترکی کا مشہور تاریخی ڈرامہ "دریلش: ارطغرل” اردو زبان میں نشر کرے گا۔

یہ قدم وزیر اعظم عمران خان کی خصوصی ہدایت پر اٹھایا جا رہا ہے کہ جنہوں نے ملک میں حقیقی اسلامی اقدار کے فروغ کے لیے اس سیریز کو دیکھنے کی بات کی تھی اور زور دیا تھا کہ اس کے پانچویں سیزنز اردو زبان میں ڈب ہونے چاہئیں۔

شائقین اس ڈرامے کو ترکی کا "گیم آف تھرونز” کہتے ہیں جو سلطنتِ عثمانیہ کے قیام سے پہلے 13 ویں صدی کے اناطولیہ کے حالات بیان کرتا ہے۔ اس ڈرامے میں سلطنت کے بانی عثمان اوّل کے والد ارطغرل غازی کی جدوجہد دکھائی گئی ہے۔ نومبر 2014ء میں ترک ٹیلی وژن چینل TRT 1 پر نشر ہونے کے بعد سے اب تک یہ ڈرامہ 60 ممالک میں ٹیلی کاسٹ ہو چکا ہے۔

وزیر اعظم کی خصوصی مشیر برائے اطلاعات و نشریات ڈاکٹر فردوس عاشق اعوان نے کہا کہ "ہم نے یہ قدم اس لیے اٹھایا ہے کیونکہ وزیر اعظم سماجی، ثقافتی اور مذہبی اقدار کا تحفظ چاہتے ہیں۔ مسلم دنیا اپنا مخصوص ثقافتی ورثہ اور اقدار رکھتی ہے لیکن ہماری نظریں مغرب کی جانب ہیں۔” اُن کے مطابق یہ ڈرامہ خاص طور پر نوجوانوں کو اسلام کی تاریخ سے آگہی اور اس کے فہم کو سمجھنے میں مدد دے گا۔

"میں نے پچھلے ہفتے جدہ میں ہونے والی اسلامی تعاون تنظیم کی گولڈن جوبلی تقریب میں شرکت کی، جہاں مسلم ممالک کے مابین ابلاغی مواد وکی تقسیم کے ذریعے مسلم ریاستوں کے مابین سماجی، ثقافتی اور مذہبی بندھن کو بہتر بنانے کی بات کی گئی۔ جس میں خصوصی توجہ مغرب میں اسلام کے حوالے سے تاثر کو بہتر بنانے کے لیے میڈیا کے استعمال اور او آئی سی ممالک کے درمیان تعلقات کو مضبوط بنانے پر دی گئی۔ وزیر اعظم عمران خان اسلاموفوبیا سے نمٹنے اور اسلامی اقدار کی بہتر تفہیم پیش کرنے کا وژن بھی رکھتے ہیں،” انہوں نے کہا۔

پاکستان ٹیلی وژن کی ڈائریکٹر برائے بین الاقوامی تعلقات شازیہ سکندر، جو اس منصوبے کی سربراہ بھی ہیں، نے بتایا کہ پی ٹی وی "ارطغرل” کی اُردو میں ڈبنگ کررہا ہے اور وہ TRT سے اس کے حقوق حاصل کر چکا ہے۔ "پی ٹی وی نے پاکستان میں ڈبنگ اور اسکریننگ کے خصوصی حقوق حاصل کر لیے ہیں،” انہوں نے کہا کہ سیریز ڈبنگ کے مرحلے میں ہے اور صداکاروں کا انتخاب بہت احتیاط سے کیا گیا ہے تاکہ اس تاریخی ڈرامے کو ناظرین کی بھرپور توجہ ملے۔

تبصرے
Loading...